Хомын талын тахийн тоо 100-д хүрлээ

  • 2020-07-23

2020 оны 7 дугаар сарын 22ны өдөр Хомын талд Шарга хэмээх тахийн гүү охин унага төрүүлж, сэргээн нутагшуулж буй тахийн тоо 100-д хүрлээ. 6 дугаар сараас эхлэн Хомын талд арван хоёр (12) унага төрснөөс арван нэг (11) нь мэнд бойжиж байна. Намар хүртэл дахиад арван хоёр (12) орчим унага төрөх төлөвтэй байна. Тахь буюу Пржевальскийн адууг түүний эх нутаг Монголд гурван байршил (Хустай нуруу, Тахийн тал, Хомын тал)-д амжилттай сэргээн нутагшуулсны үр дүнд Олон Улсын Байгаль Хамгаалах Холбоо буюу IUCN-ээс хөтөлдөг бүртгэлд “байгальд бүр мөсөн устсан” (Extinct in the wild) ангиллаас “устаж буй” (Critically endangered) ангилалд шилжүүлж, улмаар өнөөгийн байдлаар “устаж болзошгүй” (Endangered)  ангилалд оруулсан нь ховордлын хоёр зэрэглэл бууруулж чадсаныг харуулж байна. Анх 2004 онд 12 тахийг Франц улсаас Хомын талд авчирч, 2005 онд нэмж 10 тахийг Францаас, 4 тахийг Чех Улсын Праг хотын амьтны хүрээлэнгээс авчирч байсан түүхтэй билээ.